Zo Vapual

Ram Hmangaihtu Thukhawchang

Salai Martin

Photo - Chinland

Ram innghahna chu mipuiah a ni a, mipui innghahna chu sawrkarah a ni ve thung. Ram ropuina leh hausakna pawh mipuiah tam tak a innghah laiin sawrkarah pawh tawk fang chu a innghat ve bawk a ni. Ram sawrkar tha chuan ram ropui leh nuam a siam chhuak thin a, ram sawrkar tha chuan ramchhung kil khawr thlengin thianghlimna lamah te, hriselna lamah te, leh zirna, thiamna lamah te hna a thawk thin. Ram ropuina chu sawrkar tha leh tha lovah thui tak a innghat a, sawrkar tha chuan ram hruaitu tha a hring chhuak thin bawk. Sawrkar tha lo erawh chuan ram ropuina aiin ram leh hnam tlakchhiatna leh tlakranna a hring a, ramchhungah hruaitu tha lo, ei ruk hmang te a hringchhuak ve thung a ni.

Sawrkar tha chuan ramchhung kil khawr thlenga a thunun theih avangin ( mipui duh dana thuneihna hmanga thununna....) ramchhung kil khawr thlengin zalenna a thlen thin a ni. Tichuan ei rukna leh hlemhletnain hmun an chang pha lo va, a hrehawm leh a nuam tuar zain ram ropuina an dinchhuak thin a ni. Sawrkar tha lovah erawh chuan hmun tin mai hi a ralmuang lo va, hmun tinah hmelma an insiam a, hawina lam apiangah hmelna a insiam thin. Sawrkar tha lo chuan ram leh hnam a tichhia a, ram leh hnam a tichhe mai ni lovin ram leh hnamin a din chhuah theih tawh loh tur khawpa nasain hrehawmna puk thim thuk takah a hruai thin bawk.

Sawrkar hi mipui te innghahna a ni a, a pawimawh hle. Mipuiin innghahna tlaka kan neih loh chuan kha sawrkar khan awmzia a nei lo va, a hming maia sawrkar ve mai a ni. Chuvangin sawrkar chu mipui innghahna tlak sawrkar a ni tur a ni.