Zo Vapual

Martyrs Day kan hmang!

by L.M.Kima (Martin)

Photo - Google

Vawiin khan London-a awm thralai rualten Burmese Embassy hmaah Martyrs Day hriatrengna hun serh kan hmang a, mi kal kan thrahnem thaw khat hle a ni. Mi 150-200 inkar vel kan kal khawm a. Tlai lam dar 1:00 ah hunserh hman tran a ni a, hunserh tran hmain kan ram Independence hruaitu pa ber Gen. Aung San-a leh a thriante, ama ruala an kah hlum tak te sunna hun tawi minute 2 thra vel kan nei. Chumi zawhah Burma Democratic Concern Director U Myo Thein hnen atrangin thuchah tawi kan ngaithla a ni.

Tichuan thuchah tawi kan ngaihthlak hnuin au-hla kan ngaithla a, kan nei bawk a. min 10-15 thra vel kan au hnuin hnam hrang hrang aiawh te hnen atrangin thuchah tawi ngaihthlakna neih a ni a, a hmasa berin Mon hnam aiawh hnen atrangin ngaihthlak a ni a, chumi zawhah Chin hnam atrangin thuchah tawi ka va sawi ve bawk. Tichuan Chin hnam aiawh atranga thuchah tawi sawina hun ka neih zawh hnuin Shan hnam aiawh hnen atrangin ngaihthlak chhunzawm a ni leh a, chumi zawhah Kachin hnam aiawh hnen atrangin ngaihthlak chhunzawm nghal a ni. Tichuan hnam hrang hrang aiawh te hnen atranga thuchah tawi ngaihthlak zawh a nih hnuin Ko Htein Lin (BDC hruaitu) hnen atrangin thuchah thra tak ngaihthlak a ni bawk.

Hnam hrang hrang te leh BDC hruaitute hnen atranga thuchah tawi ngaihthlak zawh a nih hnuin hruaitute hnen atrangin puan tur pawimawh zualte puan a ni a, a hu ho va thlalakin a chhunzawm nghal a ni. A huhova thlalak chhunzawm a nih hnuin tlai lam 2 velah Martyrs Day 2011 chu kan hmang zo ta ruai ruai mai a ni.

Ram leh hnam tana an nunna hlan ta te hi kan ngai hlu a, kan ngai ropui bawk. Hetianga ram leh hnam tana an nunna an hlanna hian keini thrangthar leh zel te nunah pawh rah thra a chhuah a, entawntlak an nihzia kan hriat chhuah thar zel hi a pawimawh bawk a ni. Martyr te thisen chuan nang leh kei hi min au va, kan tihtheih chhun chhunah chuan ram leh hnam tan hian thrahnemngai lehzualin i bei sauh sauh ang u.....

'Kan ram hian engnge min tihsak ang tih aiin kan ram tan hian engnge ka tih ve theih ang?' tih hi i ngaihtuah threuh vang u.