Zo Vapual

Sawrkar thar ka hmuh dan....

 L.M.Kima

Tunlai kan ramchhung buaina te leh sawrkar thar hmalak dan te han en hian lung hi a awi thei mawlh lo a ni. A hmingin mipui sawrkar a ni an ti a, mipui chuan thu kan nei lem hlei lo va. He sawrkar thar hian anmahni duh dan danin ram an kaihruai a, anmahni hi dan an ni tawp a, dan chungah an thu a ni ber mai. Mipui lam atangin eng han tih theih a awm bawk si lo, ‘A che che sih hlawkah...’ tih te pawh a ang zo ta. Mipui lam atanga voice han nei thei deuh tura an hriat te chu jail-ah an khung zel bawk si a, vawiin ni thleng hian political avanga jail tang hi mi sang tel an awm a, vawiin thleng hian a tam zawk chu an la tang a ni. Danin awmzia a nei thei lo va, anmahni tawngka chhuak apiang kha dan a ni zel mai si a, ramchhung mipuite lakah an lalna an hrawt a la reh thei lo bawk.

Tun hnaia Kachin State chhunga sipai leh KIA te inkahna  leh Karen State chhunga inkahna te avang ringawt pawh hian he sawrkar thar hian ramchhungah enge a thawh tih chu a hriat mai awm e. Ramchhungah inremna lam aiin buaina a hluar tial tial a, ei leh bar a harsa tial tial bawk. Tribal (tlangmite) min hmusit em em bawk a, tlangmite min hmuhsih dan em em hi sawi aiin kan tawnhriat atangin kan hre thei zawk awm e. 
Keini Chin State lamah pawh vawiin ni thleng hian tihluihna avanga hnatlang koh te, tihluihna avanga puak phurh te, mipui dikna chanvo chhuhsak te, inhmuhsihna chi hrang hrang leh pawngsual te thlengin a la awm reng a, hei hi sawrkar tha kan ti thei ang maw....? Teuh lo mai, hetiang ram leh hnam hmangaihna chhete mah nei lo sawrkar hi sawrkar tha kan tithei lo a ni.

He sawrkar thar hi:

Eiruk hmang sawrkar,

Tribal te hmuhsih ching sawrkar,

Mipui chanvo chhuhsak/hnualsuat ching sawrkar,

Rukruk hmang sawrkar,

Pawngsual hmang sawrkar,

Mahni hmasial sawrkar,

Dawtsawi ching sawrkar,

Tualthah hmang sawrkar,

Bumhmang sawrkar,

Mipuite dikna hnualsuat ching sawrkar,

Sakhuana hmusit ching sawrkar,

Mihring thliar hran ching sawrkar a ni tak meuh mauh va, ka thinlung hian a pawm thei thlawt lo a ni ber mai.

Mipuite tana thilpek chu sawi loh mipuite hnen atanga thil lak sak ching, mipuite hnen atang hian engnge ka lak sak theih ang, mipuite hnen atang hian eng ang hlawkna nge ka neih theih ang, mipuite hi engtiangin nge ka bum theih ang, mipuite hi engtiangin nge ka hrek beh ang tih bak loh chu an rilruah a awm thlawt lo a nih hi. An van chimawm tak em..... Mipuite tan hian engnge ka tihsak theih ang tih chu a hnai lo nasa mai....

Hetiang sawrkar thar, mipuite chhawr theih hleih loh sawrkar hi kei chuan ka thinlung chhungril ber thlengin ka pawm thei thlawt lo a ni. Laiking anga leh lam awr sen a, leh lam awr dum ching sawrkar a ni. Sawrkar thaah chuan mipuite an innghat ngam thin a, sawrkar pawhin mipuite a ring zo bawk thin. Mipui tan hian engnge ka tih theih ang tih hi sawrkar tha chuan a ngaihtuah fo thin. Mipuite innghah ngamna tlak loh sawrkar chu eng sawrkar nge ni ta ang le, chu chu sawrkar tha leh puitling kan ti thei ang maw?