Zo Vapual

Lal Isua a tho leh ta!

C.Lalmuankima

Lal Isua hnathawh zingah chuan kraws-a a thihna leh thawhlehna thu hi a pawimawh ber a tihtheih hial awm e. Hei hi Kristianten kan innghahna bulpui ber pawh a ni reng a, tin, a lo kal chhan pawh,”....rawngbawl tur leh mi tam tak tlan nana a nun pe zawk turin a lo kal a ni si a.’ (Mk. 10:45). Thlaichi chu leiah kan tuh a, a tawihral hmasa zet a, chumi hnuah rawn to chhuakin a lo thanglian a, rah tam tak a chhuah ang hian Lal Isua ngei pawh kha keini misual tluchhe boral mai tur te tan vuak leh velh a nih hnu, sualna nei miah lo a nih chung pawha kraws-ah khenbeh a nih hnuin, (amah ngei chu thlai chi nungah rawn tangin chatuan nunna kan neih theihnan leh rah tam tak a chhuah theihnan ama taksa ngei chu hrehawm tinreng tuar turin a rawn inhlan a...) phumin a awm leh a, a zirtirte hnena a lo sawi lawk ang ngeiin ni thum niah kaihthawhin a awm leh ta a! Chumi a thawhlehna nun hmang chuan chatuan hremhmuna kal liam mai tur mi tam tak te nun min lo tlan ta zawk a ni! He tlanna hi a van ropui tak em! Amah ngeiin ama thisen ngeiin pa Pathian thinlunga lei leh van inrem tawh lo chu remna palaiah rawn tangin inremna min lo siamsak leh ta a ni. Lalpa chu fakin awm rawh se! Hei tluka thiltih ropui hi a awm thei chuang lo vang. Tichuan rah thlamuanawm tak chhuahin mi tam tak te min chhandam ta zawk a.

Lal Isua kha tho leh ta lo se la chuan vawiin niah nang leh kei hian Chatuan Nun kan nei ngut ang emaw chu? Lal Isua kha tho leh ta lo se la chuan sakhaw dangte aia kan rinna a danglamna a awm chuang lo vang. Kristiante, sakhaw dang laka kan danglamna chu kan rin Pathian ngei a thi a, a tho leh hi a ni. (Sakhaw dang pathianten hetiang hi an nei ve lo reng reng....) Thawhlehna thu hi Kristiante thurin bulpui pawh a ni a, Lal Isua chuan a thih tur thu te leh a thawhleh tur thute a sawi lawk vek a, chutiang chiah chuan a thleng famkim bawk a ni. Lal Isua a tho leh ngei a ni tih Bible-in hetiang hian min hrilh. (Mt. 28: Mk. 16; Lk. 24: Joh 20 & 21 ).

Tum khat chu kan thiante (sakhaw dang bia) nen sakhaw chungchangah kan inhnial a,”Kristian sakhua pawh sakhaw dang aiin a danglam chuang lo, sakhaw tinin Pathian kan zawng theuh va, kan zawn dan a in ang lo mai a ni” tiin an tang nasa mai a, chutah hun remchang chuhin,”Chuti chu Kristian sakhua nen kan in ang reng, danglamna kan nei chuang lo in ti a, a nih chuan in pathian chu a thi a, a tho leh em?” Ka ti chu chhan ngaihna hre lovin an ngawi/dang reng mai. Khai le, kan thusawi tum chu sawifiah leh chuan vak ngai lovin kan rilruah a fiah sa reng mai a, sakhaw chungchangah hnialhrat nih ka tum hauh lo bawk. Amaherawhchu sakhaw dang nena kan danglam bikna erawh chu fiah taka tihlan ka tum zawk a ni. Lal Isua kha tho leh ta lo se la chuan sakhaw dang nen kan in ang tlang vek ang a, tumah in sawisel tur kan awm bik hauh lo vang. Mahse kan rin Pathian chu thihnain a chelh hneh rual lohvin a tho leh miau si a ni. Haleluiah!

Lal Isua thihna leh thawhlehna thu hi keini ringtute hian uar taka sawi/puang chhuak tur kan ni. Chu thihna leh thawhlehna nun hmang chuan Chatuan Nunna pek kan ni si a. Kan tana a thihna leh thawhlehna avangin chatuana tlanna te, Pa Pathian nena inremna te leh chatuan nunna chu kan lo nei ta a ni. Amah avang chuan Pathian fa nih theihna te kan lo nei a, thiltihtheihna te, thlaraua lawman leh hlimna te kan lo chang ta a ni. A kut ata chu kan bo leh dawn tawh lo. (Joh. 10:28).

A nih chuan engvangin nge chhandam kan nih? tiin in zawt ta i la, misualte chhandamtu a nih vangin te pawh kan ti thei ang. Chatuan nun kan neih theihnan te pawh kan ti thei bawk ang. Chu lam chu thu khat ni se, Lal Isuan min chhandam chhan hi kan hrethiam lo fo thin a, in enfiah kan ngai leh thin. Lal Isuan min chhandam dawn khan a mualpho thei ang bera sawisak leh tih retheih a tawrh mai bakah a silhfente hlihsakin a zahthlak thei ang berin an siam a, vuak leh velh a tawrh hnuin sualna nei miah lo chu kraws-ah an khengbet ta a ni..... (A pa thu a zawm lo thei si lo va, Bible tawngkam takin vuak thitlinin a awm a.....) Keini chu e,.... a mawi thei ang ber leh a nalh thei ang bera mualpho kan tum a, hei vang hian midangte nun kan hip thei lo va, Isua hnenah kan hruai thleng thei lo bawk. A mawi hnai thei ang bera rawngbawl te, a nalh thei ang bera amah biak te hi kan Kristian nuna inelna ki pui ber emaw a tihtheih hial ta, hei vang tak hian a ni kan rawngbawlna te a nun loh phah thin ni. Tawrhna leh mualphona lo thleng tur pawh a pumpelh theih dan kawng kan zawng thin a, (Kristian nun chu pumpelh nun a ni si lo va, kan chunga thil thleng apiang lawm taka amah pawl nana hman hi a ni si a.) hei hi Lal Isuan min zirtir thin Kristian nun kawng chu a ni hauh lo mai. Lalpa tana thahnemngai in ti si hian mahni tanghma sial ran leh mahni saphing puar nan rawng kan bawl fo thin a, in enfiah a hun ta hle mai.

Mahni sualna hre tel lo va Pathian hriat chu boral tho thona a ni a, mahni tenawmzia hre tel lo va Pathian hriat chu thih tho thona a ni. Amah Evan.Tluangtea thusawi ka hriat reng pakhat (tha ve riauva ka hriat ...) chu ‘Pathian be thintu nge i nih Lalpan a biak thin?’ tih hi a pawimawh hle mai. Zofa Kristian zingah hian Pathian be thintu chu kan tam maw le. Zofate hian Pathian thu pawh kan duh hle mai a, a lawmawmin a biak pawh kan be nasa a, kan sawisel hauh lo. (Pathian biak loh ai chuan a mark a sang a, a tha tawh hrim hrim a.....) A pawimawh ber zawk chu Lalpan a biak thin ringtute kan ni em tih hi kan nun inenfiah nan i hmang theuh vang u hmiang?

Kan thupui lamah khan lut leh tawh i la, Lal Isua an khenbeh lai khan a bula mite khan au nawmnah takin ‘midang pawh a tidam thei a lawm, amah ngei pawh in tidam se la, tichuan amah chu kan ring ang’ an ti a. Mahse Pathian thil tum a tihhlawhtlin theihnan kraws ata rawn chhukin amah leh amah a intidam tlat lo. Rom sipaiten thira an khenbeh, thir zuma khenbeh a nihna hi chu e, awlsam takin a tal chhuak thei ang a, A Pa thu hmanga khenbeh a nihna avang zawk hian a tal chhuak thei tlat lo a ni. Engvang nge? Nang leh keiin Chatuan Nun kan lo neih ve theihnan a tawrh a tul tlat a ni. Chu tak chu a ni, Isua an khenbeh laia a bula miten an auh nawmnah pawha kraws-a engmah a tihtheihlohna chhan tak zawk chu. ( Pathian thu a lo thlen famkim theihnan hrehawm tin reng a tawrh a, khenbeh a nih a, phum a nih a, a thawhleh a tul a ni.)

Mahni pawh in tidam thei lo pa hmanga chhandam, chatuan nunna pek kan ni lawi si hi a makna chu a ni. Hei tluka thil mak hi a awm leh thei tawh chuang lo vang. Van ropui kalsana lei hrehawma a lo vakvai te, mi tha leh mi fel te thlang lo va, misual zawk min lo thlang te, chatuan hremhmuna kal liam mai tur chatuan nunna min pe ta hlauh te hi a lo mak em a ni! Hetiang zawng hian i lo ngaihtuah ve ngai em? Lal Isua khian mihring rilru hi a hrechiang em em a, kraws-a an khenbeh hnu khan rawn chhuk thlain rawn in tidam se la, a van makin a van ropui dawn em! Mahse, Lal Isuan chutiang chuan a ti tlat lo. Miten ropui leh mi maksak tak a nihnaa chhandamna siamsaktuah an ngai ang a; a thilmak tihah chauh an hlim ang a; amah an rin phah chuang lo vang. A nih chuan kraws-a ta kha rawn chhukin a intidam thei lo em ni? Thei teh reng e! Mitthi na lam kai tho theitu Pathian chuan Rom sipaiten an khenna thir zum te lek lek chu a pawi chhuakin a hmet sawp vek thei ang chu. Rom sipaite leh amah ringlotute zawng zawng pawh a thiltihtheihna hmangin a phin darh vek thei ang chu. Mahse, Pathian thutiam leh remruatna a lo thlen famkim theih nan a ti tlat lo. Kraws atang khan rawn chhukin amah leh amah rawn in tidam chiah se la, keiniho hi amah leh Pa thinlungah chatuanin kan dam tawh dawn lo a ni. Ama damna tur chauh zawng thei a ni lo, ama damna tur chauh zawng ta se la, keiniho hi chatuanin kan dam tawh dawn lo tihna a ni.

Chutiang bawkin ringtu nunah pawh hian mahni damna zawng zel chung chuan mite tan damna kan lo thlen thei dawn lo a lo ni reng mai. Min chhandamtu ngei khian kraws lera engmah a tihtheih lohna zawn atangin min lo chhandam miau si a. Mihringin Lalpa Pathian hmaah engmah titheilo kan nihzia kan inhriat chian hun apiangah engkim titheia zawk khian min lo luah zel dawn a lo ni reng mai. Tirhkoh Paula ngei pawhin 2 Korinth 12:9-10 a a lo sawi angin,”....chtichuan Krista thiltihtheihna chu ka chunga a awm theih nan lawm em emin ka chak lohna te hi ka chhuang tawh zawk ang,..... ka chak loh apiangin a ni ka chak thin ni.” Tiin. Paula sawi ang hian ringtuten keimahni chakna hmanga chhandam kan nih lohzia kan inhriat chian ni apiangah Lalpa khi kan nunah a rawn inpuang zel dawn a ni. “Kraws, Lal Isuan engmah  a tihtheih lohna hmun atanga chhandam kan ni si a.”

“Lal Isuan min lo tawngtaisak lo se la chuan he khawvel sual tuipuiah hian ka pil bo daih tawh ang”.

A thu malsawm thintu Lalpa Pathian chu fakin awm nawn leh rawh se. Amen!